რა თამაშები ელით მოსწავლეებს სკოლაში ახალი სასწავლო წლიდან?

ახალი სასწავლო წლიდან მოსწავლეებს სკოლებში სამაგიდო თამაშები დახვდებათ.
ამის შესახებ, განათლების მინისტრმა ალექსანდრე ჯეჯელავამ დაახლოებით ორი კვირის წინ განაცხადა.

საუბარია დაწყებით კლასებში, სწავლებაში სამაგიდო თამაშების გამოყენებაზე, როგორიცაა ასოებისგან სიტყვების შედგენა, ისტორიული მოვლენების შესასწავლი თამაშები, ლიტერატურული ნაწარმოებების შესასწავლი თამაშები და ა.შ.

აღნიშნული სამაგიდო თამაშების შესასყიდად სამინისტრომ ორი ტენდერი უკვე გამოაცხადა, რომელთა დასრულების ვადაც 4 სექტემბერია მითითებული. ორივე ტენდერი 2 000 – 2 000 თამაშის შესყიდვას გულისხმობს, რაც სამინისტროს ჯამში 49 800 ლარი დაუჯდება.

კერძოდ, ერთ-ერთი ტენდერის მიხედვით, შესყიდვის სავარაუდო ღირებულება 36 ათასი ლარია. სატენდერო დოკუმენტაციის მიხედვით, სამაგიდო თამაშები უნდა იყოს ქართულ ენაზე.

რაც შეეხება თამაშს, ის უნდა იწყებოდეს ბარათების დარიგებით, რომელზეც ანდაზა ან აფორიზმი იქნება მითითებული და მოსწავლეებს შეეძლებათ როგორც ლოტოს, ასევე ასოციაციობანას პრინციპით თამაში. თამაშის კომპლექტი უნდა შედგებოდეს აფორიზმების/ანდაზის/გამონათქვამის არანაკლებ 30 ბარათისგან, კამათლისგან, ლოტოსთვის სიტყვების არანაკლებ 152 ცალი პატარა ბარათების, მათთვის ტომარისა და მოსანიშნი ფერადი ბარათებისთვის, თამაშის ინსტრუქციისგან.
რაც შეეხება მეორე ტენდერს, მისი  მის შესყიდვის სავარაუდო ღირებულება 13 800 ლარია.

სატენდერო დოკუმენტაციის თანახმად, თამაშის ნაკრები შედგება: ყუთისგან, A3 ფორმატის ,,რუქისგან“ მინიშნებებისთვის, ცხოველების, ფრინველების და ა,შ გამოსახულების მქონე არანაკლებ 40 ცალი ბარათისგან, მოსანიშნი კენჭებისგან (3 ერთ ფერში და 1 განსხვავებულ ფერში) და ქულების მთვლელისგან (,,ფიშკები“ 2 ქულიანი 6 ცალი 1 ქულიანი 6ცალი).