თსუ-ის სტუდენტები რუსულ საზაფხულო ბანაკში მიემგზავრებიან

თბილისის სახელმწიფო უნივერსიტეტის სტუდენტები რუსულ საზაფხულო ბანაკში, მიემგზავრებიან. ამის შესახებ ინფორმაციას Кавказ.Реалии ავრცელებს.

“ყაბარდო-ბალყარეთის (რუსეთი) ბერბეკოვის სახელობის სახელმწიფო უნივერსიტეტი, ამ დღეებში, ფონდ Русский мир-ის ფინანსური მხარდაჭერით ახორციელებს პროექტს “ჩვენი ხალხების მეგობრობის ფესვები ჩვენს ისტორიაშია.” საზაფხულო სკოლის პროექტის მონაწილეებს შორის თბილისის ივანე ჯავახიშვილის სახელობის სახელმწიფო უნივერსიტეტის 4 სტუდენტიც მოხვდა, რომლებიც ყაბარდო-ბალყარეთს პირველად ეწვევიან . ჯგუფის ხელმძღვანელი – ცნობილი ქართველი პროფესორი, ჯონი კვიციანია, რომელიც წლების განმავლობაში ყაბარდო-ბალყარეთის სახელმწიფო უნივერსიტეტში მუშაობდა” – ნათქვამია სტატიაში.

გამოცემის თანახმად, საზაფხულო სკოლის პროგრამა 5-დღიანია. ორგანიზატორების თქმით, პროგრამა ითვალისწინებს ლექციებს, სალიტერატურო საღამოებს, მეჯლისსა და პატიგორსკისა და სხვა ქალაქების მუზეუმებში ვიზიტს.
როგორც სტატიაშია აღნიშნული, ფონდი Русский мир 2007 წლის 21 ივნისს პრეზიდენტ ვლადიმირ პუტინის ბრძანებლებით შეიქმნა.